Роднай мовы гук чароўны

29 лютага ў бібліятэцы-філіяле №6 у рамках праекта па літаратурным краязнаўстве “Літаратурная карта Гомеля” ў цёплай, добразычлівай атмасферы прайшла літаратурная лінгвасустрэча “Роднай мовы гук чароўны”, прымеркаваная да Міжнароднага дня роднай мовы, з удзелам члена літаратурнага аб’яднання “Пралеска” Галінай Аляксандраўнай Рагавой. На сустрэчы прысутнічалі вучні 10 класа ДУА “Сярэдняя школа №39 г. Гомеля”.

Госці літаратурнай лінгвасустрэчы з вялікай цікавасцю пазнаёміліся з біяграфіяй пісьменніцы. Галіна Аляксандраўна нарадзілася ў 1943 г. у горадзе Добруш Гомельскай вобласці. У 1966 г. скончыла філалагічны факультэт Гомельскага педагагічнага інстытута. Да 2007 года працавала настаўнікам рускай, беларускай мовы і літаратуры ў Каранёўскай школе. Зараз на пенсіі і жыве ў Каранёўцы.

Школьнікі даведаліся аб тым, што Галіна Рагавая – таленавітая паэтка Гомельшчыны, перакладчыца многіх твораў расійскіх аўтараў, член Саюза пісьменнікаў Беларусі, аўтар кніг “Роздум”, “Залатыя сходні”, “Гадзіна перад святам”, “Каліны горыч”, аўтар многіх крытычных артыкулаў, прысвечаных творчасці беларускіх пісьменнікаў, удзельнік аматарскага літаратурнага аб’яднання “Пралеска” пры Гомельскай раённай бібліятэцы, сярэбраны дыпламант конкурсу “Залатое пяро Русі” (2020 г.), лаўрэат міжнароднага конкурса “Вялікі фінал” (2015 г.) у намінацыі “Пераклады”, конкурса беларускіх аўтараў “Белакрылы птах” (2012 г.), конкурса імя Кірылы Тураўскага (2014 г.), абласнога конкурса, прысвечанага юбілею Агніі Барто і інш. З 2013 г. удзельнік Міжнароднага літаратурнага праекта «Берега дружбы».

З яшчэ большай цікавасцю прысутныя знаёміліся з творчай дзейнасцю паэткі. На працягу ўсёй сустрэчы майстар пяра дэкламавала свае вершы, прысвечаныя такім тэмам, як прыгажосць роднага краю (верш “Зямля мая, мой кут адзіны”, “У кожнага куточак ёсць”), прыгажосць прыроды (“Пад лістоты шум напеўны”, “Восень”, “Бабіна лета”, “Раніца ў лесе”), не абышла бокам і любоўную тэматыку (“У промнях свайго кахання”, “Тры словы нібы тры прамені”), а таксама закранула тэму дзяцінства, прачытаўшы гумарыстычныя вершы для дзяцей (“Клапатлівы сын”, “Здольная вучаніца”), прайшлася па “дарогах жыцця” (“На ўсё ёсць мера і за ўсё адплата”, “Калі мне лес блісне”, “Не бывае шчасця без трывог…”).

Адказваючы на пытанні прысутных, Галіна Аляксандраўна расказала дзецям кім хацела стаць у дзяцінстве, чаму піша менавіта на беларускай мове і закранула гісторыю роднай мовы.

Напрыканцы сустрэчы пісьменніца пажадала маладым падрастаючым нашчадкам быць сапраўднымі майстрамі сваёй справы, а супрацоўнікі “зялёнай” бібліятэкі, у сваю чаргу, падарылі Галіне Аляксандраўне “зялёнага” гадаванца і пажадалі ёй доўгіх гадоў жыцця, творчага натхнення і душэўных сустрэч з чытачамі.






скачать dle 10.4фильмы бесплатно