Анатоль Бароўскі – гомельскі пісьменнік, сябра грамадскай арганізацыі Саюз беларускіх пісьменнікаў. Выступае ў друку як празаік, публіцыст, паэт і мастак.

З’яўляецца старшынёй Гомельскай абласной грамадскай арганізацыі таварыства беларускай мовы (ТБМ) імя Францішка Скарыны, а таксама старшынёй Гомельскага абласнога аддзялення грамадскай арганізацыі «Саюз беларускіх пісьменнікаў» – СБП.

Анатоль Бароўскі вучыўся ў розных школах Магілёўшчыны і Гомельшчыны. Сярэднюю школу скончыў у вёсцы Асавец (1960 г.) Мазырскага раёна. Працаваў у калгасе, потым на Мазырскім заводзе жалезабетонных вырабаў, настаўнікам пачатковых класаў непадалёк ад сваёй вёскі – у Турбінцы. У 1961 годзе паступіў вучыцца ў Мазырскі педінстытут. З 1962 па 1964 год служыў у Групе савецкіх войскаў у Германіі.

Вярнуўся ў Мазыр, працягваў вучыцца завочна і працаваў у газеце "Камуніст Палесся". Працаваў інструктарам райкама партыі.

З 1968 года праходзіць службу ў войску ў Полацку – ужо афіцэрам, лейтэнантам, так званым "двухгадавіком". Пасля зноў вярнуўся ў Мазыр.

Працаваў адказным сакратаром гарадской арганізацыі таварыства "Веды" на працягу трох гадоў. Працаваў у гаркаме партыі, затым стаў намеснікам дырэктара ПТВ геалогіі.

Падчас працы ў вучылішчы нафтавікоў напісаў нарыс "На далёкай буравой" і даслаў у газету "Чырвоная змена". Нарыс заняў першае месца ў штогадовым конкурсе. З 1975 года – уласны карэспандэнт газеты "Чырвоная змена" па Гомельскай і Брэсцкай абласцях. А. Бароўскі працаваў у газете пятнаццаць гадоў.