Башлакоў Міхаіл Захаравіч – беларускі паэт, член Саюза пісьменнікаў Беларусі. Лаўрэат Дзяржаўнай прэміі Рэспублікі Беларусь (2008). Лаўрэат літаратурнай прэміі Баяна (Расія, 2004).

Міхась Башлакоў аўтар кніг паэзіі «Красавіца» (1979), «Начны паром» (1987), «Дні мае залатыя» (1993), «Як слёзы горкія Айчыны...» (паэма, 1994), «Матчыны грыбы перабіраю» (2000), «Світальныя коні» (2001), «Пяро зязюлі падніму» (2001). Разам з мастаком Міхаілам Барздыко выдаў кнігі паэзіі і графікі «Нетры» (на беларускай і рускай мовах, 2004), «Палын. Чарнобыль» (на беларускай, рускай, англійскай мовах, 2005). Аўтар кніг «Доля», «Поўня», «Ліставей», «Рамонкі», «Малітва» (разам з мастаком М. Барздыко, усе 2007).

Міхась Башлакоў у 1968 годзе скончыў Грабаўскую сярэднюю школу і паступіў на гісторыка-філалагічны факультэт Гомельскага дзяржаўнага ўніверсітэта, пасля заканчэння якога ў 1973 г. працаваў настаўнікам нямецкай мовы ў Нісімкавіцкай СШ Чачэрскага раёна (1973-1974), Цеменіцкай СШ Бранскага раёна (1974-1975), Пракопаўскай васьмігадовай школе Гомельскага раёна (1975-1978), у якой у свой час працаваў народны пісьменнік Беларусі Іван Пятровіч Шамякін. Менавіта ў Пракопаўцы Іван Шамякін пісаў свой першы знакаміты раман «Глыбокая плынь».

Пазней Міхась Башлакоў працаваў настаўнікам беларускай мовы і літаратуры ў сярэдніх школах №8, 38, 47 г. Гомеля (1978-1985). У 1985-1990 гг. – карэспандэнт-арганізатар Бюро прапаганды мастацкай літаратуры Саюза пісьменнікаў Беларусі. У 1991 годзе пераехаў з сям'ёй у Мінск. Працаваў вядучым рэдактарам, галоўным метадыстам у Міністэрстве інфармацыі Рэспублікі Беларусь, дзе займаўся падрыхтоўкай і выданнем 145-томнай гісторыка-дакументальнай хронікі «Памяць» гарадоў і раёнаў Беларусі. З лістапада 2006 года працуе ў Мінскім гарадскім аддзяленні Саюза пісьменнікаў Беларусі. Удзельнік ліквідацыі наступстваў аварыі на Чарнобыльскай АЭС (1986). Выдатнік друку Беларусі (2005).