Міхаіл Болсун – таленавіты гомельскі паэт, празаік, член Саюза пісьменнікаў Беларусі і Беларускага саюза журналістаў; лаўрэат абласнога літаратурнага конкурсу імя Івана Мележа; лаўрэат Міжнароднай літаратурнай прэміі Баяна (2013 г.); лаўрэат абласной прэміі імя Анатоля Грачанікава (2013 г.); лаўрэат літаратурнай прэміі імя Кірылы Тураўскага ў намінацыі «Паэзія» (2016 г.); узнагароджаны ганаровым знакам Саюза пісьменнікаў Беларусі «За вялікі ўклад у беларускую літаратуру» (2014 г.), ганаровы грамадзянін Чачэрскага раёна.

Міхаіл Міхайлавіч Болсун нарадзіўся 23 лютага 1942 года ў в. Балсуны Чачэрскага раёна. Скончыў факультэт педагогікі і методыкі пачатковага навучання Гомельскага педінстытута (цяпер ГДУ імя Ф. Скарыны) і аддзяленне журналістыкі Мінскай ВПШ. Працаваў рабочым калгаса, загадчыкам бібліятэкі, настаўнікам.

Жыве ў Гомелі.

Міхаіл Болсун аддаў 34 гады журналістыцы: працаваў загадчыкам аддзела, адказным сакратаром, намеснікам рэдактара чачэрскай раённай газеты «Трыбуна камунізму», галоўным рэдактарам буда-кашалёўскай газеты «Авангард», старшым рэдактарам і загадчыкам аддзела Гомельскага абласнога тэлерадыёаб'яднання.

М. М. Болсун – аўтар шасці паэтычных зборнікаў: «Яблыня ў фаце» (2004), «Там, дзе задумлівы Сож…» (2006), «Далоні цёплыя зямлі» (2009), «Спатканне з поўняй» (2009), «Пад сузор'ем дабрыні» (2012), «Роднае, блізкае» (2016) і кнігі нарысаў «Чечерский след в науке» (2014).

Друкуецца ў калектыўных зборніках Расіі, Украіны, Беларусі, шматлікіх газетах і часопісах. Піша на беларускай мове.